Phelps vinnur sitt 10. og 11. Ólympíugull

Bandaríski sundmaðurinn Michael Phelps lætur sér ekki duga að setja nýtt viðmið, heldur munar ekki um að rústa því gamla. Hann vann í nótt sitt tíunda og ellefta Ólympíugull, og er á góðri leið með að slá met landa síns Mark Spitz, sem vann sjö gull á einum leikum árið 1972.

Enginn annar hefur unnið jafn mörg Ólympíugull frá upphafi, 11 talsins, og gullin í Peking eru nú orðin fimm talsins. Phelps á þrjár greinar eftir og er afar líklegur til að fara alla leið og vinna þær líka.

Hann bætti að auki tveim heimsmetum í safnið, en þau met hans eru nú orðin jafn mörg og sundgreinarnar sem hann hefur keppt í á leikunum í Peking. Phelps sigraði í 200 metra flugsundi á nýju heimsmeti, 1:52,03 mínútu en í undanrásunum hafði hann sett Ólympíumet með því að synda á 1:53,70.

Lazslo Cseh frá Ungverjalandi hreppti silfrið á 1:52,70 mínútu og virðist líklegastur allra til að ógna veldi Phelps á næstu árum. Matsuda Takeshi frá Japan varð þriðji á nýju Asíumeti, 1:52,97 mínúta.

Phelps var síðan í bandarísku boðsveitinni sem sigraði í 4x200 metra skriðsundi, og varð fyrsta boðsveitin til að synda á innan við sjö mínútum. Nýtt heimsmet hennar er 6:58,56 mínútur og bætti gamla metið um 4,68 sekúndur.

• 2 blogg um fréttina

Bloggað um fréttina

• Ómar Ingi: NR1
• Emil Örn Kristjánsson: Enn saxar hann á... árþúsundamet í fallhættu