Viðskipti | mbl | 21.11.2006 | 11:27

Nafni Avion Group breytt í HF Eimskipafélag Íslands

Magnús Þorsteinsson, stjórnarformaður Eimskipafélags Íslands mbl.is/ÞÖK

Hluthafafundur Avion Group samþykkti í dag að breyta nafni félagsins í Hf Eimskipafélag Íslands. Breytingin tekur gildi þegar í stað og verður nafni félagsins breytt í Kauphöll Íslands á morgun.

Magnús Þorsteinsson stjórnarformaður Hf Eimskipafélags Íslands, segir í fréttatilkynningu:
„Eimskip hefur vaxið með ógnarhraða á síðustu misserum. Með kaupum á kanadíska fyrirtækinu Atlas sem ræður yfir 53 frystigeymslum víðs vegar í Norður Ameríku nánast tvöfaldast Eimskip á nýjan leik. Nú er svo komið að ríflega 80% af veltu félagsins kemur frá Eimskip.

Á sama tíma liggur ljóst fyrir að nafn Eimskip er mun þekktara á markaðssvæðum félagsins og nýtur mikils trausts og velvildar.

Það má heldur ekki gleyma því að þetta óskabarn þjóðarinnar á djúpar rætur í sögu þjóðarinnar og margir hafa saknað nafnsins. Það er þó ekki tilfinningasemi sem gerir það að verkum að þessi nafnabreyting hefur orðið. Hins vegar skal ég viðurkenna að mér og fleiri stjórnarmönnum finnst einkar ánægjulegt að þetta stóra nafn íslenskrar atvinnusögu sé á nýjan leik hafið til vegs og virðingar.”

Hf. Eimskipafélag Íslands samanstendur nú af Eimskip og Air Atlanta Icelandic ásamt tengdum fyrirtækjum.

Eimskip rekur 157 starfsstöðvar í Evrópu, N-Ameríku, S-Ameríku og Asíu. Fyrirtækið er með 40-50 skip í rekstri, 1.350 flutningabíla og yfir 100 frystigeymslur og starfsmenn félagsins eru um 8.500.

Air Atlanta Icelandic er flugfélag sem sérhæfir sig í fraktlausnum fyrir viðskiptavini sína og fellur því vel að flutningafélaginu Eimskip Air Atlanta Icelandic er með um 20 starfsstöðvar í Evrópu, Asíu, N-Ameríku og Afríku. Félagið er með um 25 flugvélar í rekstri. Starfsmenn félagsins eru tæplega þúsund talsins af fjörutíu þjóðernum.

Hf. Eimskipafélag Íslands er í dag hlutafélag sem er í eigu hátt í tuttugu og fimm þúsund hluthafa. Hf. Eimskipafélagið gerir ráð fyrir að velta félagsins nemi 133 milljörðum króna á árinu 2007, samkvæmt tilkynningu.

Tveir nýir stjórnarmenn voru kjörnir á fundinum. Stjórn félagsins fram að aðalfundi 2007 er því þannig skipuð:

Magnús Þorsteinsson, formaður stjórnar, Eggert Magnússon, Gunnar M. Bjorg, Sindri Sindrason og Þór Kristjánsson.