Viðskipti | AP | 22.1.2007 | 17:51

Pfizer segir upp 10 þúsund manns

Bandaríska lyfjafyrirtækið Pfizer Inc. tilkynnti í dag, að fækkað verði um 10 þúsund störf innan fyrirtækisins en Pfizer stefnir að því að lækka kostnað um 2 milljónir dala á ársgrundvelli til að styrkja stöðu sína í geysiharðri samkeppni á lyfjamarkaði.

Fyrirtækið ætlar að loka þremur rannsóknarstofum í Michigan og tveimur verksmiðjum í New York og Nebraska. Hugsanlega verða verksmiðjur í Þýskalandi seldar og rannsóknarstofum í Japan og Frakklandi lokað.

Þetta er í annað skipti á tveimur árum sem Pfizer kynnir endurskipulagningu á rekstri en fyrirtækið tapar um 14 milljarða dala tekjum á þessu ári vegna þess að einkaleyfi á tilteknum lyfjum eru runnin út.