Gríðarlega mikilvægt að ná mjúkri lendingu segir bankastjóri Landsbankans

Bankastjóri Landsbankans, Sigurjón Þ. Árnason, segir að það sé gríðarlega mikilvægt að hagkerfið nái mjúkri lendingu í ár og á næsta ári. Ef það gerist ekki dregur mjög úr möguleikum þess að hægt verði að nýta þau sóknarfæri sem umbreytingar síðustu ára hafa skapað. Þetta kom fram í erindi Sigurjóns á Iðnþingi í dag.

Sigurjón segir að mesta hættan sem efnahagslíf Íslands glími við sé að ekki takist að skapa forsendur fyrir varanlegum stöðuleika í efnahagsmálum. Takist það ekki er ólíklegt að hér verði hægt að skapa forsendur fyrir áframhaldandi framförum í efnahagsmálum. Pólitísk óvissa um mikilvæg atriði geti haft neikvæð áhrif á mörgum sviðum og Íslendingar gætu misst eignarhald og stjórn á lykilfyrirtækjum í þjóðfélaginu úr sínum höndum.

Að sögn Sigurjóns er mikilvægt að ríkið fari varlega varðandi opinberar framkvæmdir til að ryðja ekki öðrum verkefnum úr vegi.

Erum á villigötum varðandi uppbyggingu framhaldsnáms

Hann segir að mikilvægi menntunar fari vaxandi og segist hann telja að Íslendingar séu að hluta til á villigötum varðandi uppbyggingu framhaldsnáms á háskólastigi. Áherslan eigi að vera á grunnnám og meistaranám hér heima en sækja eigi frekari sérhæfingu erlendis.

• 2 blogg um fréttina

Bloggað um fréttina

• Baldvin Jónsson: Jú, við erum að sjálfsögðu öll sammála því, en....
• Andrés Magnússon: Ný þjóðarsátt?