Olíuverð ekki hærra í 10 mánuði

Verð á hráolíu hækkaði á mörkuðum í dag og hefur ekki verið hærra í tæpt ár eða frá því í ágúst á síðasta ári. Ástæðan fyrir verðhækkuninni var einkum fréttir frá Nígeríu um að uppreisnarmenn á olíuvinnslusvæðunum við ósa Nígerfljóts hefðu rænt fimm útlendingum í morgun. Einnig er búist við að nýjar tölur, sem birtast í Bandaríkjunum á morgun, muni sýna aukna eftirspurn eftir eldsneyti og minnkandi birgðastöðu.

Verð á tunnu af Brent Norðursjávarolíu komst í 73,12 dali í dag og hefur ekki verið hærra frá 25. ágúst á síðasta ári. Í New York komst verðið í 71,50 dali og hefur heldur ekki verið hærra í rúma 10 mánuði.

• 1 blogg um fréttina

Bloggað um fréttina

• Þorsteinn Gunnarsson: Nígeríukrimmarnir klikka ekki