Úrskurður um brot Microsoft á samkeppnislögum staðfestur

Evrópudómstóll samkeppnismála staðfesti í morgun þann úrskurð framkvæmdastjórnar Evrópusambandsins frá árinu 2004, að bandaríski hugbúnaðarframleiðandinn Microsoft hafi misnotað markaðsráðandi stöðu sína á einkatölvumarkaði í Evrópu. Staðfesti dómstóllinn einnig, að Microsoft skuli greiða tæplega hálfan milljarð evra í sekt fyrir brot sitt.

Samkvæmt ákvörðun samkeppniyfirvalda innan Evrópusambandsins frá því í mars 2004 var Microsoft sektað um 497 milljónir evra fyrir brot á samkeppnislögum. Samkvæmt úrskurðinum var Microsoft gert að að koma með á markað í Evrópu nýja útgáfu af Windows, sem innihéldi ekki Media Player-forritið fyrir hljóð- og myndskrár, og veita upplýsingar, sem gera öðrum fyrirtækjum kleift að framleiða vefþjóna, sem geta unnið með Windows.

Dómstóllinn sagði að Microsoft hefði gerst sekt um að misbeita yfirburðastöðu sinni á markaði fyrir tölvuhugbúnað til að ná fótfestu á markaði fyrir tölvunetþjóna. Þá sagði dómstóllinn, að samkeppnisyfirvöld hefðu sýnt fram á, að keppinautar fyrirtækisins hefðu skaðast.

• 3 blogg um fréttina

Bloggað um fréttina

• Geir Ágústsson: Windows-notendur skuli greiða tæplega hálfan milljarð evra í sekt fyrir …
• Ari Guðmar Hallgrímsson: Allt í lagi að ýta við Microsoft
• Helgi Þór Guðmundsson: Ekki er öll vitleysan eins !!!