Stýrivextir lækkaðir um 0,5% í Bandaríkjunum

Stjórn Seðlabanka Bandaríkjanna hefur ákveðið að lækka stýrivexti bankans um 0,50%, úr 5,25% í 4,75%. Er þetta heldur meiri lækkun en sérfræðingar á fjármálamarkaði gerðu ráð fyrir en samkvæmt meðalspá Reuters meðal greiningaraðila var almennt gert ráð fyrir 0,25% lækkun vaxta nú en vextir bankans hafa verið óbreyttir frá því um mitt síðasta ár.

Tilkynning Seðlabanka Bandaríkjanna hafði mikil áhrif á hlutabréfaverð á Wall Street því Dow Jones vísitalan hækkaði um rúm tvö hundruð stig strax eftir að tilkynnt hafði verið um lækkun vaxta.

Rekja má vaxtalækkunina til þeirra vandræða sem hafa verið á lánamarkaði og þær sviptingar sem hafa verið á fjármálamörkuðum undanfarnar vikur ásamt slakri stöðu húsnæðismarkaðar í Bandaríkjunum.

• 3 blogg um fréttina

Bloggað um fréttina

• Ívar Pálsson: Federal Reserve sneri öllu við
• Geir Ágústsson: Áfram er rússíbananum haldið keyrandi
• Þröstur Unnar: Hef bara andskotan ekkert að blogga um - Getur hugsast …