Verða af viðskiptasamningum vegna lélegrar enskukunnáttu

Norsk fyrirtæki móðga erlenda viðskiptavini sína, verða af viðskiptasamningum og eru treg til útrásar á nýja markaði - allt vegna slæmrar enskukunnáttu starfsfólks og kaupsýsluforkólfa, samkvæmt niðurstöðum nýrrar rannsóknar. „Norðmenn telja sig mun betri í ensku en þeir raunverulega eru,“ sagði höfundur rannsóknarinnar.

Frá þessu greinir norska blaðið Aftenposten í dag. Höfundur rannsóknarinnar er samanburðarmálvísindamaðurinn Glenn Ole Hellekjær, hjá Kennslumiðstöð í erlendum tungumálum í Noregi.

Í rannsókn hans kom m.a. fram, að ríflega annar hver framkvæmdastjóri viðurkenndi að hafa móðgað erlendan viðskiptavin með slakri enskukunnáttu sinni.

Hátt í 30% þeirra 664 framkvæmdastjóra sem Hellekjær ræddi við sögðu fyrirtæki sín hafa forðast útrás til nýrra markaða vegna þess að ekki hefði verið talið að innan fyrirtækisins væri fyrir hendi nauðsynleg enskukunnátta.

40 af hundraði viðmælendanna kváðust hafa orðið af viðskiptasamningum við erlenda viðskiptavini beinlínis vegna lélegrar enskukunnáttu.

Hellekjær telur að norsk fyrirtæki þurfi að „líta faglegri augum á tungumálakunnáttu,“ og myndu hagnast á því að senda starfsfólk á tungumálanámskeið.

• 1 blogg um fréttina

Bloggað um fréttina

• Magnús Geir Guðmundsson: Ætti ég kannski að flytja til Noregs?