Mörg hundruð íslendingar í heimsókn til Kína

Björn Jóhann Björnsson skrifar frá Kína
Flugvél á vegum Eimskips lenti fyrir skömmu í Qingdao í Kína með hátt í 350 íslenska gesti sem flestir verða viðstaddir formlega opnun frysti- og kæligeymslu félagsins hér í borg, þeirrar stærstu í Kína. Tveggja tíma töf varð á ferð vélarinnar frá Keflavík, þar sem skipta varð um varahluti í einum hreyfli vélarinnar, sem er af gerðinni Boeing 747-300. Flugferðin sjálf gekk áfallalaust fyrir sig.

Íslendingarnir fengu höfðinglegar móttökur á flugvellinum í Qingdao, þar sem fulltrúar borgarinnar tóku á móti stjórnendum Eimskips og fulltrúum Faxaflóahafna, sem komið hafa að samstarfi við hafnaryfirvöld í Qingdao.

Frá flugvellinum að hótelinu fengu Íslendingar sérstaka lögreglufylgd þar sem mikill viðbúnaður var viðhafður á götum borgarinnar. Talið er að um 1.300 manns hafi með einum eða öðrum hætti komið að móttöku á íslensku sendinefndinni, sem í allt telur hátt í 350 manns.

Viðbúnaðurinn skýrist m.a. af því að Eimskipshópurinn er í Qingdao á vegum borgaryfirvalda, og von er á forseta Íslands, Ólafi Ragnari Grímssyni, til að vera viðstaddur opnunina á laugardag, auk þess sem hann mun vera viðstaddur viðskiptaþing sem fer fram á morgun, föstudag, með þátttöku Qingdao-borgar, Útflutningsráðs, Eimskips og fleiri íslenskra fyrirtækja.