Yfir Lehman í Asíu

Sigurbjörn Þorkelsson hefur verið ráðinn yfirmaður hlutabréfaviðskipta fjárfestingarbankans Lehman Brothers á Asíumarkaði. Talsmaður bankans segir á vef bankans að þekking Sigurbjarnar af afleiðuviðskiptum verði ómissandi við uppbyggingu bankans í Asíu.

Sigurbjörn hóf fyrst störf hjá Lehman Brothers árið 1992 og starfaði þá við afleiðuviðskipti. Árið 1994 flutti hann sig um fjögurra ára skeið til kanadíska bankans Canadian Imperial Bank of Commerce (CIBC) en sneri síðan aftur til Lehman Brothers. Þá stýrði hann hlutabréfaafleiðusviði og var árið 2001 valinn einn af framkvæmdastjórum bankans. Hann hefur verið yfirmaður afleiðuviðskipta, bæði í Bandaríkjunum og nú síðast í Evrópu.