Vangaveltur um fjármögnun rangar

Lausafjárstaða Kaupþings er prýðileg, að sögn Sigurðar Einarssonar, stjórnarformanns bankans, en skuldatryggingarálag bankans hefur áttfaldast frá því í sumarbyrjun.

"Við áttum okkur ekki alveg á því hvers vegna skuldatryggingarálag á Kaupþing er svo hátt sem raun ber vitni," segir Sigurður og sér fyrir sér lækkun álagsins þegar menn fari að átta sig á því hver raunveruleikinn sé. Segir hann vangaveltur greiningardeilda hinna bankanna síðustu daga um óvissu tengda fjármögnun Kaupþings vera rangar. Segir hann lausafjárstöðu bankans mjög góða og enga ástæðu fyrir bankann að fara út á skuldabréfamarkaðinn eins og sakir standa. Bætir hann við að endurfjármögnunarþörf bankans á næsta ári muni nema um 1,7 milljörðum evra sem ekki geti talist mikið og verði ekki allt í einu.