Litlar breytingar á kortaveltu milli mánaða

Kreditkortavelta nam rúmum 24 milljörðum króna í síðasta mánuði og var nánast óbreytt milli mánaða. Frá sama tíma í fyrra jókst kortavelta hins vegar að raungildi um 15%, en þá er til þess að líta að í október 2006 var veltan með rýrasta móti, ef miðað er við mánuðina á undan og eftir.

Seðlabankinn birti nýverið tölur um greiðslukortaveltu til og með október.

Í Morgunkorni Glitnis kemur fram að kreditkortavelta, að viðbættri debetkortaveltu í innlendum verslunum, gefur sterka vísbendingu um þróun einkaneyslu þegar leiðrétt er fyrir breytingum verðlags og gengis. Talsverðar sveiflur hafa hins vegar verið í veltutölunum milli mánaða undanfarið. Þriggja mánaða hlaupandi meðaltal gefur því gleggri mynd af þróun kortaveltu en mánaðartölur, og samkvæmt því er um 8% raunaukningu kortaveltu að ræða milli ára.

„Telja má líklegt að frekar dragi úr vexti kortaveltu á ársgrundvelli eftir því sem á veturinn líður. Háir innlendir vextir auka greiðslubyrði skammtímaskulda almennings, auk þess sem nú fer heldur að hægjast um í hagkerfinu í kjölfarið á lokum stórframkvæmda. Við bætist að meiri blikur virðast nú á lofti en áður um verðþróun helstu eigna almennings næsta kastið," samkvæmt Morgunkorni Glitnis.

• 1 blogg um fréttina

Bloggað um fréttina

• Jakob Falur Kristinsson: Kreditkort