Hlutafjárdýfan tekur alla með

Það eru ekki einasta hlutafjáreigendur sem verða fyrir barðinu á niðursveiflu á hlutabréfamarkaði. Öll heimili í landinu verða fyrir óbeinum áhrifum af verðfallinu. Samhengi er á milli hlutabréfaverðs og gengis krónunnar. ,,Fyrstu áhrifin geta verið veiking krónunnar og það mun stuðla að aukinni verðbólgu,“ segir Gylfi Arnbjörnsson, framkvæmdastjóri ASÍ. Verðlækkun hlutabréfa getur líka snert lífeyrissparnað landsmanna. Hlutabréf verða sífellt stærri hluti af verðbréfaeign lífeyrissjóða, sem gerir þá viðkvæmari fyrir sveiflum á mörkuðum. „Þetta getur leitt til þess að staða lífeyrissjóðanna versni,“ segir Gylfi.