Heimskuleg viðskipti

Viðskiptatímaritið Fortune hefur birt lista yfir 101 heimskulegt atvik í viðskiptalífinu á árinu sem er að líða. Það allra vitlausasta að mati Fortune er þegar innkalla varð milljónir hættulegra leikfanga, sem framleidd voru í Kína. Apple, Sony og París Hilton eru einnig á meðal þeirra sem komast á listann í ár.  

Í öðru sæti var hugmynd Eli Lilly sem gekk út á það að setja geðlyfið Prozac í pillur sem væru ætlaðar hundum. Hægt var að tyggja pillurnar sem voru með kjötbragði. Tilgangurinn með þessu var sá að draga úr kvíðaröskun hunda þegar eigendurnir yfirgefa þá.

Í þriðja sæti er svo ákvörðun auðkýfingsins Leonu Helmsley, sem lést í ágúst sl., að láta hundinn sinn erfa 12 milljónir dala.  

Í 51. sæti lenti tölvufyrirtækið Apple. Níu ára gömul stúlka fékk bréf frá lögmönnum Steve Jobs, forstjóra fyrirtækisins, eftir að hún hafði sent honum nokkrar línur varðandi það hvernig bæta mætti iPod-tónlistarspilarann hennar. Lögmenn Apple svöruðu um hæl og sögðu að fyrirtækið taki ekki við hugmyndum sem ekki er beðið um. Þá sögðu þeir henni jafnframt að senda ekki fleiri hugmyndir til þeirra.

Þá vöktu deilur milli Sony og Dómkirkjunnar í Manchester athygli á árinu þegar Sony ákvað að nota kirkjuna sem sviðsetningu í ofbeldisfullum tölvuleik (Resistance: Fall of Man). Sony bað síðar kirkjuyfirvöld afsökunar á þessu. Þessi hugmynd Sony lenti í 63. sæti yfir heimskulegustu atvik ársins 2007.

Lista Fortune má sjá hér.