Næstmesta hækkun hlutabréfa frá upphafi

Hlutabréf hækkuðu mikið í verði í Kauphöll Íslands í dag. Úrvalsvístialan endaði í 5451 stig, sem er 4,82% hækkun frá í gær. Er þetta næstmesta hækkun vísitölunnar á einum degi í sögu kauphallarinnar en sú mesta var 6,11% í október árið 2001.

Úrvalsvísitalan hefur verið reiknuð út frá árinu 1998 en hefur verið reiknuð afturvirkt til þess tíma sem hlutabréfaviðskipti hófust með formlegum hætti hér á landi. Miðað við það er hækkunin í dag sú þriðja hæsta en í mars 1993 hækkaði vísitalan um 5% á einum degi.

Hlutabréf Atlantic Petroleum hækkuðu um 17,89% í dag, bréf SPRON um  9,67%, Exista um 7,38% og FL Group um 5,94%. Bréf Icelandic Group lækkuðu um 1,21%.

Greiningardeild Kaupþings segir í ½5 fréttum sínum, að ætla megi að kaupendur hafi beðið á hliðarlínunni eftir að óveðrinu slotaði og streymt inn í stríðum straumum inn á markaðinn í dag eftir að ljóst varð að hann hafði náði til botns í bili á miðvikudaginn. Þessi atburðarás sverji sig í ætt við þá þróun, sem hafi orðið á alþjóðlegum hlutabréfamörkuðum í vikunni.

Þar með sé ekki sagt að hækkanir síðustu dægrin séu varanlegar  enda ríki mikil óvissa enn á fjármálamörkuðum með tilheyrandi óstöðugleika. Á hitt beri að líta að verðkennitölur margra íslenskra fyrirtækja,  einkum í fjármálaþjónustu, séu orðnar mjög hagstæðar eftir undanfarna lækkunarhrinu.

• 1 blogg um fréttina

Bloggað um fréttina

• Sveinn Ólafsson: Örugglega ekkert með Ólaf F. að gera?