50 milljarða hagnaður Exista

Hagnaður Exista eftir skatta nam 573,9 milljónum evra, jafnvirði 50 milljarða króna og jókst um 34,5% milli ára. Á síðasta ársfjórðungi var 295,6 milljóna evra tap, jafnvirði 26 milljarða króna, á rekstri. Segir félagið, að miklar sviftingar á fjármálamörkuðum hafi haft veruleg áhrif á virði eigna.

Fram kemur í tilkynningu Exista, að í lok janúar hafi félagið aðgang að tryggu lausafé sem nemi endurfjármögnunarþörf félagsins vel fram til ársins 2009, eða í 69 vikur.  

Haft er eftir Lýð Guðmundssyni, stjórnarformanni Exista, að óvenjulega skarpt verðfall á mörkuðum hafi reynt á undirstöður félagsins og Exista hafi sýnt mikinn styrk við þær aðstæður. Exista sé undir það búin, að takast á við ytri sveiflur og sé rekstri félagsins og áhættustýringu í samræmi við það.

„Stjórnendur félagsins gera sér grein fyrir að hluthafar okkar hafa fundið fyrir miklum sveiflum í verði hlutabréfa að undanförnu, eins reyndar fjárfestar víða um heim. Hins vegar teljum við að Exista hafi skapað sér afar athyglisverða stöðu á norrænum fjármálamarkaði sem feli í sér mikil tækifæri fyrir félagið til framtíðar," segir Lýður.

Exista kynnti einnig í dag breytingar á skipulagi félagsins. Markmið breytingannna er sagt vera að undirstrika enn frekar fjármálaþjónustu sem kjarnastarfsemi félagsins. Tvö ný stoðsvið, Rannsóknir og Fjárstýring, hafa verið sett á laggirnar, en eigin viðskipti hafa verið lögð niður.

Tilkynning Exista

• 1 blogg um fréttina

Bloggað um fréttina

• Ólafur Als: Hafa fyrirtækin efni á stórri niðursveiflu?