Landsvirkjun gefur út skuldabréf fyrir 6,3 milljarða

Landsvirkjun  gaf út í vikunni tvö skuldabréf, annars vegar að fjárhæð 75 milljónir dala og hins vegar 2000 milljónir jena en samtals svara þessar skuldabréfaútgáfur  til um 6,3 milljarða króna.   Eftir þessar lántökur hefur Landsvirkjun öruggt lausafé út árið 2009 eða í 24 mánuði. 

Lánstíminn á dollaraskuldabréfinu er 10 ár og umsjónaraðili útgáfunnar er þýski bankinn Depfa.  Lánstíminn á jenaskuldabréfinu er 3 ár og umsjónaraðili er japanski bankinn Mizuho International.  Kjörin á þessum útgáfum jafngilda liborvöxtum að viðbættu 15-20 punkta álagi.

Landsvirkjun segir, að aðstæður á lánamörkuðum hafi almennt ekki verið hagstæðar frá því í ágúst sl. þegar áhrifa af bandarísku húsnæðislánakreppunni fór að gæta.  Fjármálafyrirtæki hafi þurft að afskrifa töluverðar fjárhæðir og erfiðleikar í bandaríska hagkerfinu hafi teygt anga sína yfir á aðra markaði.  Í kjölfarið hafi r mikil áhættufælni ríkt á mörkuðum og fjárfestar  haldið að sér höndum. 

Þrátt fyrir þessi óhagstæðu ytri skilyrði hafi Landsvirkjun gefið út skuldabréf á mjög hagstæðum kjörum sem séu langt undir því skuldatryggingarálagi, sem íslenskir aðilar búi nú við á erlendum lánamörkuðum.  Fjármögnun ársins 2008 fari því afar vel af stað.

Heildarfjárþörf fyrirtækisins fyrir árið 2008 er um 600 milljónir dala.