Spyr út í kaupréttarsamninga Glitnis

Vilhjálmur Bjarnason, formaður félags fjárfesta og hluthafi í Glitni, hefur sent stjórn Glitnis fyrirspurn þar sem hann óskar eftir því að fá uppgefið hvernig hagsmuna hluthafa Glitnis er gætt í gildandi kaupréttarsamningum við starfsmenn bankans. 

Spyr hann sérstaklega út í kaupréttarsamning við forstjóra bankans fyrir 150 milljónum hluta á genginu 26,6 samtals að fjárhæð 3.990 milljónir króna. 

„Bent er á að kaupréttarsamningar byggjast á ráðstöfun á óseldum hlutum, sem hluthafar eiga að öðru jöfnu forkaupsrétt að. Þessi forgangsréttur felur í sér verðmæti fyrir hluthafa, sem stjórn ber að gæta að eins og annarra hagsmuna hluthafa bankans.

Við hvaða starfsmenn Glitnis banka hf hefur stjórn félagsins gert kaupréttarsamninga og eru í gildi í dag?

Hve hár er kaupréttur við hvern og einn starfsmann, hvert er samningsgengi í einstökum samningum og hvert er viðmiðunargengi í samningunum?

Í hvaða tilfellum er viðmiðunargengi kaupréttarsamninganna stundargengi á samningsdegi eða á síðustu 10 – 20 dögum fyrir gerð samnings?

Hvaða ástæður lágu til þess að gerður var kaupréttarsamningur við forstjóra bankans fyrir 150 milljónum hluta á genginu 26,6, samtals að fjárhæð 3.990.000.000, og hver er áætlaður kostnaður Glitnis banka af þessum samningi? 

Hver eru áhrif þessa samnings á  hagnað á hlut annarra hluthafa vegna þessa samnings?

Á hvern hátt eru gildandi kaupréttarsamningar tengdir við afkomu bankans, ávöxtun eigin fjár, breytingar á markaðsgengi hlutabréfa og viðmiðun við markaðsvísitölur hlutabréfa?"

• 2 blogg um fréttina

Bloggað um fréttina

• Guðrún María Óskarsdóttir.: Gott mál að spyrja spurninga.
• Sigurður Sveinsson: Athyglisvert.