Alþjóðlega matsfyrirtækið Moody's hefur lækkað lánshæfismat íslensku viðskiptabankanna þriggja. Er langtímaeinkunn Kaupþings  lækkuð um einn flokk, úr Aa3 í A1, en einkunn Glitnis og Landsbankans um 2 flokka, í A2. 

Er langtíma lánshæfiseinkunn Landsbankans og Kaupþings nú sú sama og hún var í upphafi síðasta árs en einkunn Glitnis er einum flokki lægri. 

Þá hefur einkunn Kaupþings fyrir fjárhagslegan styrk verið lækkuð úr C í C-. Einkunn  danska bankans FIH, sem er í eigu Kaupþings er óbreytt, A1/C.

Moody's segir, að lausafjárstaða Kaupþings sé sterk, m.a. vegna þess að bankinn hætti við kaup á hollenska bankanum NIBC og boðaðrar eignasölu hjá Singer & Friedlander í Bretlandi.

Einkunn Landsbanka fyrir fjárhagslegan styrk er einnig lækkuð úr C í C-. Moody's segir, að lækkun á matseinkunnum bankans endurspegli áhyggjur matsfyrirtækisins af gæðum eignasafns bankans og möguleikum á hagnaði í ljósi versnandi efnahagshorfa á Íslandi og í heiminum öllum þótt afkoma bankans á þessum sviðum hafi verið þokkalega góð á síðasta ári.

Einkunn fyrir fjárhagslegan styrk Glitnis var einnig lækkuð í C- af svipuðum ástæðum og einkunn Landsbankans.

Moody's segir, að á ekki sé útlit fyrir að einkunnir bankanna hækki á ný á næstunni. Hins vegar gæti svo farið í tilfellum Glitnis og Kaupþings ef dregið verður úr lánum til tengdra aðila og Landsbankans ef þar er dregið úr útlánaáhættu.

Á sama hátt gæti þrýstingur á einkunnirnar til lækkunar aukist ef þessir áhættuþættir færu vaxandi.

Tengdar fréttir

Moody's

Sama lánshæfismat og fyrir ári

• Álit bankanna á mati Moody's

• 3 blogg um fréttina

Bloggað um fréttina

• Marinó G. Njálsson: Mat byggt á hverju?
• Haukur Nikulásson: Greiningardeildir og fyrirtæki oft ekki mikið betri en spákerlingar
• Ólafur Als: Miklar sveiflur á einu ári