Viðskiptahallinn 200 milljarðar

Viðskiptahalli á síðasta ári var um 200 milljarðar króna en árið 2006 mældist hann 296 milljarðar króna. Batann má að stórum hluta til rekja til minni vöruskiptahalla, en hann var um 88 ma.kr. samanborið við 156,5 ma.kr. halla árið 2006. Þetta kemur fram í nýjum tölum frá Seðlabanka Íslands.

Viðskiptahalli var 91 milljarður króna á síðasta fjórðungi ársins samanborið við 29 milljarðar á þriðja ársfjórðungi. Meginskýring lakari viðskiptajafnaðar er að jöfnuður þáttatekna versnaði um 68 milljarðar króna. Það skýrist af talsverðum samdrætti í ávöxtun hlutafjár, að mestu í formi neikvæðrar endurfjárfestingar, en á móti vega hærri vaxtatekjur af skuldabréfum. Á gjaldahlið vega hærri vaxtagjöld nokkurn veginn upp minni ávöxtun erlendra aðila af hlutabréfum, samkvæmt vef Seðlabanka Íslands.

Samkvæmt bráðabirgðatölum hefur viðskiptahalli liðins árs verið 15,8% af vergri landsframleiðslu (25,5% árið 2006) en í síðustu þjóðhagsspá Seðlabankans var áætlað að hann yrði 18%.

• 2 blogg um fréttina

Bloggað um fréttina

• Brjánn Guðjónsson: Náðuð þið þessu?
• Einar Vignir Einarsson: Og hvað svo.....