Aukin svartsýni meðal íslenskra neytenda

Samkvæmt væntingavísitölu Gallup í mars hefur svartsýni íslenskra neytenda aukist talsvert frá síðustu mælingu. Í febrúar var vísitalan rétt yfir hundrað stigum sem gefur til kynna um það bil jafn marga jákvæða og neikvæða svarendur. Vísitalan fellur hins vegar niður í 87,1 stig nú og hefur ekki mælst lægri frá því í janúar 2002.

Hvort tveggja mat á núverandi ástandi og væntingar til næstu sex mánaða taka dýfu frá síðustu mælingu. Væntingar neytenda sveiflast almennt í takt við gengi krónunnar, enda hefur gengislækkun áhrif á kaupgetu heimila bæði í innfluttri neyslu sem og innlendri með aukinni verðbólgu. Það kemur því ekki á óvart hversu mikið dregur úr væntingum neytenda nú þegar gengi krónunnar er í sögulegu lágmarki, samkvæmt Hálf fréttum Kaupþings.

Færri hyggja á utanlandsferðir

Stórkaupavísitalan lækkar um 2,4 stig á fyrsta ársfjórðungi 2008 frá fyrri ársfjórðungi og hyggja því færri á stórkaup nú í upphafi árs, en stórkaupavísitala Gallup tekur mið af fyrirhuguðum kaupum landsmanna á húsnæði, bifreiðum og utanlandsferðum.

Mesta breytingin er í fyrirhuguðum utanlandsferðum, en sú vísitala lækkar um 9,8 stig enda gengisfall krónunnar ferðalöngum ofarlega í huga.

• 1 blogg um fréttina

Bloggað um fréttina

• hofy sig: Skrítið!