Viðskipti | mbl | 2.4.2008 | 10:48

„Gildra fyrir birni verður að koma á óvart"

mbl.is

Íslensk stjórnvöld undirbúa að hafa bein afskipti af gjaldeyris- og hlutabréfamarkaði til þess að koma í veg fyrir árásir erlendra vogunarsjóða á íslenskan fjármálamarkað. Með þessu vilja stjórnvöld refsa þeim sem eiga hlut að máli, samkvæmt frétt á vef Financial Times. Þar er haft eftir Geir H. Haarde, forsætisráðherra, að hann vilji ekki gefa upp hvernig afskiptum verði háttað. „Gildra fyrir birni verður að koma á óvart".

Segir Geir í viðtalinu að stjórnvöld vilji losna við þessa aðila af bakinu og nú séu skoðaðir allir möguleikar í stöðunni. Segir hann þörf á aðgerðum þar sem bæði fjármálamarkaður og gjaldeyrismarkaður landsins varð á ósanngjarnan hátt og jafnvel ólöglegan hátt fyrir veikingu vegna aðgerða vogunarsjóða sem vilja ekkert annað en hafa fé upp úr spilinu.

Segir Geir í viðtalinu að Seðlabankinn og ríkisstjórnin hafa ýmis úrræði til þess að hafa áhrif á stöðu mála og þau ráð hafi ekki öll verið enn nýtt.

Í gær tóku matsfyrirtækin Fitch Ratings og Standard & Poor's lánshæfismat íslenska ríkisins til endurskoðunar með mögulega lækkun í huga. Samkvæmt Fitch er horfum fyrir lánshæfismat ríkissjóðs vegna langtímaskuldbindinga hefði verið breytt í neikvæðar úr stöðugum. Lánshæfiseinkunn ríkissjóðs var hins vegar staðfest, hún er A+ fyrir erlendar langtímaskuldbindingar. Þá greindi Standard & Poor's frá því að það hefði tekið til athugunar lánshæfiseinkunnir ríkissjóðs fyrir langtímaskuldbindingar með neikvæðum vísbendingum.

Í tilkynningu Standard & Poor's segir að ákvörðun fyrirtækisins endurspegli það mat að skort hafi á upplýsingar um hvernig íslensk stjórnvöld ætli að takast á við aukin efnahagsleg viðfangsefni. Þessi viðfangsefni komi að mestu til vegna þrýstings í tengslum við lánsfjármögnun Íslands í erlendum gjaldmiðli sem gæti leitt til beins opinbers stuðnings við þrjá stærstu bankana.