Olíuverð hækkar á ný

Verð á hráolíu til afhendingar í maí hækkaði um 3,85 dali tunnan eða 3,8% á olíumarkaði í New York í dag eftir að bandarísk stjórnvöld greindu frá því að varabirgðir af bensíni höfðu dregist saman þriðju vikuna í röð. Viðskipti voru með hráolíu á 104,83 dali tunnan en Brent Norðursjávarolía hækkaði um 3,58 dali tunnan, í 103,75 dali, á olíumarkaði í Evrópu í dag.

Orkumálaráðuneyti Bandaríkjanna greindi frá því að varabirgðir af hráolíu hafi aukist um 7,3 milljónir tunna í síðustu viku sem er mun meiri aukning en talið var. Hins vegar drógust bensínbirgðir saman um 4,5 milljónir tunna sem er  tvöfalt meiri samdráttur en spár gerðu ráð fyrir.

Markaðurinn brást strax við þessum fréttum og hækkaði verð á bensíni og olíu strax, eftir að hafa haldist nokkuð stöðugut að undanförnu. Hafði þetta einnig áhrif á hlutabréfamarkað þar sem fjárfestar óttast frekari hækkanir og að neytendur dragi enn frekar saman neysluna af ótta við samdrátt í efnahagslífinu.

Evran hækkaði gagnvart Bandaríkjadal og er 1,5664 dalir í viðskiptum á gjaldeyrismarkaði í New York í kvöld. Breska pundið hækkaði einnig og er 1,9885 dalir.

• 3 blogg um fréttina

Bloggað um fréttina

• Jón Ármann Steinsson: ég heiti Jón og ég er olíuneytandi...
• Ía Jóhannsdóttir: Nú bunar gullvökvinn í tonnatali úr slöngunni hingað inn
• Jón Finnbogason: Sleppum álögum á allt sem gæti grandað olíunotkun.