Viðskipti | mbl | 2.4.2008 | 17:35

Skuldatryggingarálagið lækkar umtalsvert

Skuldatryggingarálag íslensku bankanna, sem hefur verið í hæstu hæðum að undanförnu, lækkaði umtalsvert í dag og meira en áður eru dæmi um. Álag á Kaupþing er komið í 900 punkta og lækkaði um 86 punkta frá gærdeginum, álag á Glitni stendur einnig í 900 punktum (102 punkta lækkun) og álag Landsbankans er 700 (144 punkta lækkun).

Í Vegvísi Landsbankans kemur fram að þessi mikla lækkun álagsins kom nokkuð á óvart í ljósi tilkynningar matsfyrirtækjanna S&P og Fitch Ratings í gær um breyttar horfur fyrir lánshæfismat íslenska ríkisins, íslensku viðskiptabankanna, Íbúðalánsjóðs og Landsvirkjun. Í tilkynningum þeirra voru horfur fyrir langtímaskuldbindingar breytt úr stöðugum í neikvæðar en horfur fyrir skammtímaskuldbindingar héldust áfram stöðugar.

Kynntu stöðuna í Lundúnum í gær

„Í gær kynntu forstjórar íslensku bankanna stöðu þeirra á alþjóðlegri bankaráðstefnu í London sem sótt er af evrópskum fjárfestum og greiningaraðilum. Erlendir fjölmiðlar hafa einnig fjallað ítarlega um stöðuna á Íslandi síðustu daga og leitað skýringa á óvenjulegri stöðu mála hér á landi og sögusögnum um mögulegar „árásir" á þá markaði er mestu ráða um gengi krónunnar og hlutabréfaverð.

Markaðurinn fyrir skuldatryggingar íslensku bankanna er bæði ógegnsær og frekar „þunnur", þ.e. samningarnir eru ekki verðlagðar í formlegum kauphallarviðskiptum, fáir aðilar bjóða þá og viðskipti eru strjál, sem gerir það að verkum að flökt í verði er tiltölulega hátt. Þá má einnig leiða að því getum miðað við þróun verðlagningarinnar undanfarna mánuði að þessi markaður sé einkar viðkvæmur fyrir nýjum fréttum," samkvæmt Vegvísi Landsbankans.

Hátt skuldatryggingarálag undanfarið virðist ekki endurspegla líkur á að bankarnir geti staðið við skuldbindingar um endurgreiðslu á lánum. Miðað við eðlilega verðmyndun þessara samninga ættu þeir sem halda á styttri skuldabréfum bankanna að meta líkur á gjaldþroti bankanna á bilinu 40-60%. Það jafngildir því að bankarnir séu þegar komnir í algjör þrot. Því fer auðvitað fjarri, samkvæmt Vegvísi Landsbankans.

„Tvennt getur því skýrt hvers vegna álagið hefur náð þessum hæðum. Annars vegar þrálátur orðrómur um að skortsalar hafi notfært sér þrönga stöðu á skuldatryggingarmarkaði til þess að keyra upp verð og búa til óvissu um endurfjármögnun bankanna sem aftur hefur átt sterkan þátt í því að hlutabréfaverð þeirra fellur eins og dæmin sanna.

Hins vegar að viðskipti með skuldabréf bankanna á eftirmarkaði hafa aukist að undanförnu þar sem vogunarsjóðir og fjármálafyrirtæki um allan heim hafa verið að vinda ofan af skuldabréfavafningum til þess að lágmarka áhættu. Skuldabréf íslensku bankanna höfðu ratað inn í marga slíka vafninga undanfarin 1-2 ár vegna þess að bréfin þóttu fýsilegur fjárfestingakostur vegna verðlagningar og hárrar lánshæfiseinkunnar útgefenda. Þannig hefur myndast umframeftirspurn eftir skuldatryggingum en framboð á þeim hefur jafnframt verið takmarkað út af almennri áhættufælni í kerfinu," að því er segir í Vegvísi Landsbankans