407 þúsund nýskráningar á atvinnuleysisskrá í Bandaríkjunum

Nýskráningum á atvinnuleysisskrá í Bandaríkjunum fjölgaði í síðustu viku um 38 þúsund á milli vikna í 407 þúsund og hafa þær ekki verið jafn miklar í rúm tvö ár, eða frá því í september 2005. Þykir þetta vera enn ein vísbendingin um slæmt ástand í bandarísku efnahagslífi. Fyrir ári síðan voru nýskráningarnar 319 þúsund talsins.

Eru þetta mun fleiri einstaklingar heldur en spár hagfræðinga hljóðaði upp á en þeir töldu að nýskráningar yrðu um 365 þúsund talsins. Talið er að páskar spili eitthvað inn í aukninguna en ekki var tekið við skráningum í páskavikunni.

Þeim sem þiggja atvinnuleysisbætur af staðaldri fjölgaði um 97 þúsund og eru þeir nú 2,94 milljónir talsins, samkvæmt tölum frá 22. mars sl. Hafa þeir ekki verið fleiri frá því í júlí 2004.

Í gær viðurkenndi formaður bankaráðs Seðlabanka Bandaríkjanna, Ben Bernanke, í fyrsta skipti að það stefndi í samdrátt í bandarísku efnahagslífi. Margir hagfræðingar telja hins vegar að samdráttarskeiðið sé þegar hafið.

• 1 blogg um fréttina

Bloggað um fréttina

• Baldur Fjölnisson: Hagvísar á stöðugri niðurleið í BNA