Væntingavísitalan lækkar um 17,9%

Íslenskir neytendur eru svartsýnir á stöðu og horfur í efnahags- og atvinnulífi um þessar mundir. Væntingavísitala Gallup, sem birt var í morgun, mælist 67,9 stig í júní og hefur lækkað um 17,9% frá fyrri mánuði. Um er að ræða fjórða mánuðinn í röð sem vísitalan mælist undir 100 stigum sem þýðir að fleiri neytendur séu svartsýnir en bjartsýnir.

Væntingar neytenda hafa dregist hratt saman síðan í fyrrahaust og er væntingavísitalan nú 53% lægri en á sama tíma fyrir ári síðan. Vísitalan hefur aðeins tvisvar mælst lægri en nú en það var í síðustu efnahagslægð sem hagkerfið gekk í gegnum, eða í október og nóvember árið 2001. Allar undirvísitölur væntingavísitölunnar lækka nú á milli mánaða, að því er segir í Morgunkorni Glitnis.

Vísitalan fyrir stórkaup lækkar nú um  11% á milli ársfjórðunga. Hefur vísitalan lækkað jafnt og þétt frá síðasta sumri, þegar lausafjárkrísan braust út. Undirvísitölurnar fyrir bifreiðakaup, íbúðakaup og utanlandsferðir lækka allar og eru nú í eða nálægt sögulega lágmarki. Sér í lagi er athyglisvert að þeim sem telja mjög eða frekar líklegt að þeir kaupi bíl næsta hálfa árið fækkar nærri um helming frá síðustu mælingu í mars. Neytendur eru því mun ólíklegri nú en  til að ráðast í kaup á bifreiðum, húsnæði eða utanlandsferðum, að því er fram kemur í Morgunkorni Glitnis.

• 1 blogg um fréttina

Bloggað um fréttina

• G. Valdimar Valdemarsson: Það er engin ástæða til bjartsýni