Verðbólga 4% á evrusvæðinu

Verðbólga mældist 4% í evru-ríkjunum í júní og hefur aldrei verið jafn mikil, samkvæmt frétt frá Hagstofu Evrópu. Skýrist aukin verðbólga einkum af háu matar- og eldsneytisverði. Eru taldar auknar líkur á að Seðlabanki Evrópu hækki stýrivexti á fimmtudag til þess að mæta auknum verðbólguþrýstingi.

Í maí mældist verðbólga á evru-svæðinu 3,7% en verðbólgumarkmið Seðlabanka Evrópu eru 2%.