Verð á hráolíu enn yfir 140 dölum tunnan

Verð á hráolíu hækkaði um 35 sent í rafrænum viðskiptum á NYMEX markaðnum í New York í morgun. Er verð á hráolíu til afhendingar í ágúst nú 140,35 dalir tunnan en það fór hæst í 143,67 dali tunnan í gær. Lækkaði verð á hráolíu fyrir lokun markaða í gærkvöldi og var lokaverðið 140 dalir tunnan.

Í Lundúnum hækkaði verð á Brent Norðursjávarolíu um 57 sent í morgun og er 140,40 dalir tunnan.

Sérfræðingar á olíumarkaði segja að ýmislegt valdi því að olíuverð haldist jafn hátt og raun ber vitni. Þar megi nefna áhyggjur af olíubirgðum, hvort árás verður gerð á Íran og lágt gengi Bandaríkjadals. Virðast margir vera á því að olíuverð eigi eftir að fara yfir 150 dali tunnan á næstu vikum. Eins telja sérfræðingar líklegt að Seðlabanki Evrópu muni hækka stýrivexti á fimmtudag til þess að reyna að sporna gegn verðbólguþrýstingi. Verðbólga mælist nú 4% á evrusvæðinu og hefur aldrei verið jafn mikil.

• 1 blogg um fréttina

Bloggað um fréttina

• Halldór Jónasson: Dollarinn búinn að lækka, olían lækkar en ekki lækkar eldsneytið …