Olían hækkar og hækkar í verði

Verð á hráolíu hefur haldist yfir 144 dölum tunnan í rafrænum viðskiptum á NYMEX markaðnum í New York í nótt og í morgun. Í gær var lokaverðið 143,57 dalir tunnan sem er hæsta lokagildi hráolíu á NYMEX. Nam hækkun dagsins í gær 2,60 dölum tunnan. Á olíumarkaði í Lundúnum í morgun fór verð á Brent Norðursjávarolíu hæst í 145,75 dali tunnan.

Helstu skýringar á hækkun olíuverðs nú eru upplýsingar sem birtar voru í gær um að olíubirgðir í Bandaríkjunum væru minni heldur en talið var. Búast má við mikilli eldsneytisnotkun á næstu dögum enda þjóðhátíðardagur Bandaríkjanna á morgun.

Jafnframt óttast margir að  samskipti Írana og vesturveldanna eigi eftir að versna. 

Síðar í dag mun bankastjórn Seðlabanka Evrópu kynna stýrivaxtaákvörðun sína og er ekki talið ólíklegt að þeir muni hækka vegna aukins verðbólguþrýstings. 

• 2 blogg um fréttina

Bloggað um fréttina

• Snorri Bergz: Olíuverðið
• Karl Jónsson: Gleymdi nokkrum atriðum í upptalningunni