Verkefni GGE munu verða færri og stærri

Ólafur Jóhann Ólafsson, rithöfundur og aðstoðarforstjóri Time Warner-fjölmiðlasamsteypunnar, er nýr hluthafi í Geysir Green Energy og hann var kjörinn stjórnarformaður félagsins á hluthafafundi í gær.

Ólafur Jóhann sagði í samtali við Morgunblaðið í gær að ný stjórn væri sammála því að félagið myndi í framtíðinni einbeita sér að færri og stærri verkefnum.

„Við munum fremur verða ráðandi í þeim verkefnum sem við ráðumst í og geta þannig betur hlúð að því sem við eigum,“ sagði Ólafur Jóhann.

Á fjórum markaðssvæðum

„Í Þýskalandi er fyrirtækið byrjað að bora eftir heitu vatni. Þar er fyrirtækið með frekari leyfi til borana og verkefnastaðan lítur mjög vel út því orkuverð í Þýskalandi er mjög hátt og markaður fyrir græna orku er því mjög vænlegur í því landi,“ sagði Ólafur Jóhann.

Hann bindur einnig miklar vonir við samstarfsverkefni GGE við kínverska stórfyrirtækið Signopec um byggingu hitaveitna í Kína.