Ósætti á hluthafafundi SPRON

Nokkurt ósætti er með framlagða tillögu stjórnar SPRON á hluthafafundi félagsins og hafa nokkrir hluthafar stigið í pontu og viðrað skoðanir sínar á samrunanum og samrunaferlinu.

Hafa stjórnendur SPRON verið sakaðir um ósannindi þegar þeir hafa sagt stöðu SPRON góða og hafa hluthafar sagt Kaupþing hafa öll tögl og hagldir í samrunaferlinu. Hafa hluthafar leitt líkur að því að stjórn SPRON hafi vitað að verðmat SPRON við hlutafélagavæðingu félagsins, þar sem sjóðurinn var metinn á 60 milljarða, stæðist ekki. 

Þá hefur af fundarmönnum verið dregið í efa yfirlýsingar stjórnar SPRON að SPRON muni lengi fá að vera sjálfstæð eining innan Kaupþings og að uppsagnir verði ekki að veruleika. 

Birgir Örn Steingrímsson, hluthafi, lagði það til á fundinum að verði sameiningin samþykkt muni óánægðir hluthafar ráða sér lögfræðing og leita réttar síns. 

Þá hefur eignarhald SPRON á hlutabréfum í Exista verið gagnrýnt og hún sögð áhrifavaldur í því hvernig komið er fyrir SPRON nú.  

• 1 blogg um fréttina

Bloggað um fréttina

• Hafsteinn Viðar Ásgeirsson: Sami grautur í sömu skál.