Enn mun hægja á efnahagsumsvifum

Enn mun hægja á efnahagslegum umsvifum í ríkjum Efnahags- og framfarastofnunarinnar, OECD, samkvæmt nýrri mælingu á samsettum leiðandi hagvísum stofnunarinnar.

Vísitala sem sett er saman úr hagvísunum mældist 96,8 stig í júnímánuði sem er lækkun um 0,6 stig frá mánuðinum á undan og 5 stigum lægra en í sama mánuði í fyrra. Þegar vísitalan mælist undir 100 stigum og fer auk þess lækkandi er það til marks um að hægja muni á umsvifum en vísitalan er hönnuð til þess að gefa vísbendingar um efnahagsþróun komandi mánaða.

Verulega hægir á á evrusvæðinu

Auk þess að mæla vísitöluna fyrir OECD sem heild leitar stofnunin vísbendinga um þróun mála í stærstu hagkerfum stofnunarinnar. Hagvísarnir benda til þess að hægja muni verulega á umsvifum á evrusvæðinu á næstu mánuðum og ber þar hæst Ítalíu og Frakkland. Einnig mun hægja á umsvifum í Bretlandi og Bandaríkjunum, þó ekki eins skarpt.