Segir gengið munu lækka enn frekar

Allt bendir til þess að fjárfestar muni halda áfram að selja krónur og að gengi íslensku krónunnar muni lækka enn frekar. Kemur þetta m.a. fram í bréfi sem Beat Siegenthaler, sérfræðingur hjá TD Bank, sendi frá sér í fyrradag. TDB er með um 60-70% af öllum útistandandi krónubréfum og segir hann að við núverandi aðstæður sé enginn hvati fyrir fjárfesta að gefa út eða kaupa ný krónubréf.

Í bréfinu gagnrýnir hann Seðlabanka Íslands fyrir hægagang í stækkun gjaldeyrisvarasjóðsins og fyrir að gefa ekki nógu sterklega í skyn að stýrivaxtahækkanir væru möguleiki í stöðunni. „Er það ekki til þess fallið að auka trúverðugleika bankans á fjármálamörkuðum,“ segir í bréfinu. Hefur Siegenthaler áhyggjur af því að vaxtamunur á skiptimarkaði hafi dregist mjög saman.