Forseti Bandaríkjanna, George W. Bush, segir að aukin inngrip stjórnvalda á fjármálamarkaði  séu ábyrg og nauðsynleg til þess að stöðva verstu fjármálakreppuna sem landið hafi glímt við í áratugi. Það hefði verið mun hættulegra að bregðast ekki við.

„Bandarískt efnahagslíf er að takast á við fordæmalausar áskoranir. Við tökumst á við þær með fordæmalausum aðgerðum," sagði Bush á fundi með fjölmiðlum ásamt fjármálaráðherra Bandaríkjanna, Henry Paulson, formanni bankastjórnar Seðlabanka Bandaríkjanna, Ben Bernanke og Christopher Cox, stjórnarformanni Fjármálaeftirlits Bandaríkjanna, Securities and Exchange Commission.

„Nú er tímabært  að leysa vandann," sagði Bush við fréttamenn í Rósagarðinum við Hvíta húsið í Washington í dag.