Greiningardeild Kaupþings spáir 1,1% hækkun vísitölu neysluverðs

Greiningardeild Kaupþings spáir 1,1% hækkun á vísitölu neysluverðs í september sem þýðir 14,3% hækkun á 12 mánaða tímabili. Áhrif útsöluloka verða til töluverðrar hækkunar auk þess sem áhrif gengisveikingar krónu síðustu mánuði halda áfram að skila sér út í verðlag. Greiningardeildin telur að 12 mánaða verðbólga muni ná hámarki í næstu mælingu í október.

„Líkt og undanfarna mánuði má búast við að verðlagshækkunin dreifist á marga undirliði. Útsölulok á fatnaði og skóm munu orsaka talsverða hækkun milli mánaða, sem Greiningardeild áætlar að verði í grennd við 0,4%.

Einnig má gera ráð fyrir að áhrif hækkandi matvöruverðs muni áfram skila hækkun á VNV.

Sá undirliður VNV sem lýtur að kostnaði við íbúðakaup mun sennilega hafa takmörkuð áhrif að þessu sinni.

Hinsvegar má gera ráð fyrir jákvæðum áhrifum af húsnæðisliðnum í heild eins og í síðasta mánuði en þá höfðu t.a.m. viðhald og viðgerðir mikil áhrif til hækkunar. Eldsneytisverð hefur haldist fremur stöðugt að undanförnu og mun hafa smávægileg áhrif til lækkunar VNV í september að okkar mati," að því er segir í verðbólguspá greiningardeildar Kaupþings.

Að auki má búast má við hárri mánaðarhækkun VNV í október næstkomandi, væntanlega yfir 1%, að því er segir í verðbólguspánni.

„Ástæðan er fyrst og fremst frekari gengisveiking krónunnar síðustu daga og vikur svo og hærri fjármagnskostnaður fyrirtækja. Vísitala neysluverðs hækkar því um 2,4% á næstu tveim mánuðum skv. okkar spá. Hinsvegar má gera ráð fyrir að tólf mánaða verðbólga nái hámarki í október en þá teljum við að hún geti mælst nálægt 15%.

Líklega mun þó taka að hægja á mánaðarhækkunum VNV síðustu tvo mánuði ársins. Að mati greiningardeildar mun snarlega hægja á mánaðarhækkunum VNV þegar gengi krónunnar staðnæmist eða tekur að styrkjast," samkvæmt spá greiningardeildar Kaupþings.

• Blogga um frétt