„Þegar við heyrðum af þessu um helgina þá kom þetta á óvart enda ekkert sem benti til þess að þetta væri í uppsiglingu,“ segir Björgvin G. Sigurðsson, viðskiptaráðherra, um kaup ríkisins á 75% hlut í Glitni.

„Það sá enginn fyrir að endurfjármögnunarsamningum Glitnis yrði rift svona fyrirvaralaust. Ég fékk fyrst veður af þessu á föstudaginn þegar haft var samband við formann Samfylkingarinnar og henni gerð grein fyrir því sem var í uppsiglingu. Aðrir ráðherrar fengu síðan upplýsingar um þetta síðar um helgina,“ segir Björgvin.

„Ríkið mun losa þennan eignarhlut á næstu misserum,“ segir Björgvin aðspurður hversu lengi ríkið mun ráða yfir þessum hlut í bankanum. Hann segir það ráðast algjörlega af stöðunni á alþjóðlegum mörkuðum. „Þetta er ekki langtímafjárfesting, heldur neyðaraðgerð. Það er ekki markmiðið að reka bankann til lengdar.“

Þorsteinn Már Baldvinsson, stjórnarformaður Glitnis, hefur sagt að hann hafi frekar viljað sjá ríkið eignast helmingshlut. „Þetta var það tilboð sem Seðlabankinn og sérfræðingar hans töldu heppilegast,“ segir Björgvin. Hann segist ekki tilbúinn að tjá sig um það að ríkið og Seðlabankinn hafi lagt sérstaka áherslu á það í nótt að eignast þetta stóran hlut.

Spurður um mögulegar breytingar á yfirstjórn bankans segir Björgvin að Lárus Welding og Þorsteinn Már verði áfram við stjórnvölinn. Engar ákvarðanir í aðra veru hafi verið teknar.

Tengdar fréttir

Bankakreppa

Biðu sömu örlaga og Ísland

• Vilja að bankarnir endurgreiði aðstoðina
• Merki um siðrof í þjóðfélaginu
• Eignir metnar á 775 milljarða
• Auknar álögur á íbúa Grimsby

» Fleiri tengdar fréttir

• 1 blogg um fréttina

Bloggað um fréttina

• Huldabeib: Hmm, voðalega er það lélegt...