Viðskipti | mbl | 30.9.2008 | 11:45

Veiking krónunnar 2,6%

Árni Sæberg

Gengi krónu hefur haldið áfram að lækka í morgun eftir að hafa náð sögulegu lágmarki í gær. Gengisvísitalan lokaði í 186,80 í gær og hefur gengið aldrei mælst lægra í lok dags. Gengi krónunnar hefur lækkað um 2,6% það sem af er degi og stendur gengisvísitalan í 191,65 stigum en fór hæst í 192,31 í viðskiptum í morgun.

Í Morgunkorni Glitnis kemur fram að margir samverkandi þættir valda veikingu krónunnar. Dregið hefur úr trausti á fjármálamörkuðum í kjölfar atburða síðustu vikna og hverrar tilkynningarinnar á fætur annarri um að bankar í Bandaríkjunum, Bretlandi, Belgíu og Danmörku eigi í erfiðleikum með að fjármagna sig.

Þá gerði útslagið í gær að fulltrúadeild Bandaríkjaþings hafnaði 700 milljarða dala björgunaráætlun til handa fjármálakerfinu vestra sem setti ugg að fjárfestum um heim allan. Enn fremur skapaðist óvissa á hérlendum markaði í gær eftir tilkynningu um kaup ríkisins á 75% hlut í Glitni.

Stórir gjalddagar á krónubréfum framundan

„Skert aðgengi að erlendu láns- og lausafé hefur þessu til viðbótar dregið verulega úr skilvirkni gjaldeyrismarkaðar og hafa þrengingar á innlendum markaði með gjaldmiðlaskiptasamninga átt stóran þátt í veikingu krónu síðustu mánuði. Þær hafa til að mynda gert fjárfestum afar óhægt um vik að framlengja í þeim krónubréfum sem fallið hafa á gjalddaga síðustu mánuði.

Stórir gjalddagar eru framundan í næsta mánuði, en alls falla krónubréf að nafnvirði 45 ma.kr. á gjalddaga í október, þar af 29 ma.kr. á næsta mánudag. Loks má nefna að dagurinn í dag er síðasti dagur 3. ársfjórðungs, en ársfjórðungsmót hafa undanfarið verið mikill álagstími á peningamarkaði þar sem fjármálastofnanir um heim allan halda fast um allt lausafé sitt fyrir uppgjör sín, bæði í sínum heimagjaldmiðli sem í öðrum myntum," að því er segir í Morgunkorni Glitnis.

Það sem af er degi nemur veltan á millibankamarkaði 23,3 milljörðum króna og gengi Bandaríkjadals er 102,07 krónur. Evran er 146,37 krónur og pundið 183,98 krónur.