Viðskipti | mbl | 7.10.2008 | 18:15

Raungengið 50% undir sögulegu meðaltali

Svonefnt raungengi, sem er mælikvarði á samkeppnisstöðu gagnvart öðrum þjóðum, er tæplega 50% undir meðaltali síðustu 30 ára og lægsta gildi sem mælst hefur á því tímabili. Segir Greiningardeild Landsbankans ljóst, að gengi krónunnar sé nú langt frá því sem samrýmist jafnvægi.

Raungengið lækkaði um tæp 7% milli ágúst og september samkvæmt tölum frá Seðlabanka Íslands og frá því á sama tíma í fyrra hefur raungengið lækkað um nær fjórðung og litlu minna frá áramótum.

Í ½5 fréttum Kaupþings segir, að þegar raungengið lækki fái útflytjendur hagstæðara verð fyrir vörur sínar og því megi eiga von á að verðmæti útflutnings aukist mikið á næstunni. Að sama skapi megi búast við að innflutningur aukist í krónum talið til skamms tíma en þegar neytendur og fyrirtæki lagi sig að hærra verði á innfluttum vörum megi búast við að innflutningur dragist saman.

Þessi þróun komi mjög skýrt fram í vöruskiptajöfnuði sem hafi verið að batna jafnt og þétt á árinu. Telur Greiningardeild Kaupþings, að þessi þróun muni halda áfram og afgangur verði af vöruskiptum strax á næsta ári.

Í Vegvísi Landsbankans segir að raungengið geti færst nær jafnvægi með tvennum hætti: Í fyrsta lagi með hækkun á nafngengi krónunnar og í öðru lagi með verðbólgu umfram verðbólgu í viðskiptalöndunum.

„Sú leið sem farin verði hafi úrslitaáhrif á efnahagsframvinduna á næstu misserum, þar með talið atvinnuástandsins, kaupmáttar og efnahagsreiknings heimila og fyrirtækja. Fyrir þjóðfélagið í heild er afar mikilvægt að leiðréttingin verði í gegn um styrkingu krónunnar, fremur en verðbólgu. Efnahagsaðgerðir stjórnvalda munu leitast við að tryggja þá leið og er mikilvægt að slíkar aðgerðir komi sem fyrst," segir Landsbankinn.