Viðskipti | mbl | 9.10.2008 | 9:17 | Uppfært 9:33

Nýi Landsbanki tekur við

Aðalstöðvar Landsbankans við Austurstræti.

Fjármálaeftirlitið ákvað á stjórnarfundi í dag að Nýi Landsbanki Íslands hf. tæki yfir hluta af eignum, réttindum og skyldum Landsbankans hf. og heyrir innlendi hluti af starfsemi bankans frá þeim tíma því undir nýtt fyrirtæki og nýja stjórn. Elín Sigfúsdóttir hefur tekið við starfi bankastjóra en hún starfaði sem framkvæmdastjóri fyrirtækjasviðs Landsbankans.

Fjármálaeftirlitið nýtti sér heimild á grundvelli laga sem sett voru á Alþingi á mánudag til þess að skipa skilanefnd fyrir Landsbanka Íslands hf. og tók hún til starfa á þriðjudag. Sama dag stofnaði ríkissjóður Íslands nýtt hlutafélag, Nýja Landsbanka Íslands hf., sem nú hefur tekið við rekstri innlenda hluta Landsbankans.

Um er að ræða rekstur allra útibúa á landinu, útlánastarfsemi og aðra hefðbundna bankastarfsemi. Áætlað er að heildarfjöldi starfsmanna hins nýja banka verði í kringum 1000 manns sem allir munu koma úr röðum núverandi starfsmanna Landsbankans.

Framkvæmdastjórar bankans eru Anna Bjarney Sigurðardóttir á útibúasviði, Árni Þór Þorbjörnsson á fyrirtækjasviði, Jón Þorsteinn Oddleifsson á fjármálasviði, Stefán Héðinn Stefánsson á eignastýringarsviði,Guðmundur Guðmundsson á rekstrarsviði, Gunnar Viðar á lögfræðisviði og Atli Atlason á starfsmannasviði. Yfir áhættustýringu bankans verður Þórir Örn Ingólfsson.

Framkvæmdastjórn bankans mun kynna nýtt skipurit og umfang þeirrar starfsemi sem um ræðir við starfsfólk bankans í dag og næstu daga.

Fjármálaeftirlitið segir, að engin breyting verði á hefðbundnum viðskiptum milli bankans og viðskiptavina hans. Útibú bankans muni starfa óbreytt og engin breyting verður á opnunartíma þeirra. Þjónusta við einstaklinga og fyrirtæki verður sú sama og notkun greiðslukorta verður með hefðbundnum hætti. Sömu inn- og útlánsreikningar verða í hinum nýja banka eins og áður var. Netbanki og hraðbankar starfa í óbreyttri mynd.

Elín Sigfúsdóttir, nýráðinn bankastjóri er viðskiptafræðingur að mennt. Hún starfaði hjá Búnaðarbanka Íslands í rúma tvo áratugi og var síðast framkvæmdastjóri fyrirtækjasviðs og sat í bankaráði bankans. Hún var ráðin til Landsbankans árið 2003 sem framkvæmdastjóri fyrirtækjasviðs.