IMF vill aðstoða Ungverja

Alþjóðagjaldeyrissjóðurinn (IMF) sagðist í dag vera reiðubúinn að aðstoða Ungverja vegna efnahagserfiðleika, sem þar eru vegna alþjóðlegu fjármálakreppunnar.

Segir Dominique Strauss-Kahn, framkvæmdastjóri IMF, í yfirlýsingu, að sjóðurinn vinni með ungverskum stjórnvöldum og Evrópusambandinu að leiðum til að mæta ástandinu, þar á meðal að veita hugsanlega tæknilega eða fjárhagslega aðstoð. 

Ferenc Gyurcsány, forsætisráðherra Ungverjalands, sagðist í dag fagna þessari yfirlýsingu en aðeins verði leitað til IMF um fjárhagsaðstoð ef öll önnur sund lokast. 

„Við þurftum á þessu tilboði að halda svo þeir, sem ráðast á okkur, sjái að við höfum öfluga stuðningsmenn og að Ungverjaland stendur ekki eitt," sagði Reutersfréttastofan eftir Ferenc Gyurcsány.

Ungverjaland hefur verið skilgreint sem nýmarkaðsland líkt og Ísland og hefur farið illa út úr fjármálakreppunni. Fjárfestar hafa flúið þaðan í öruggari höfn dala, evra og svissneskra franka.

• 1 blogg um fréttina

Bloggað um fréttina

• Guðmundur Jónas Kristjánsson: ESB-ríkið Ungverjaland þarf aðstoð IMF. Ha?