Viðskipti | mbl | 24.11.2008 | 13:40

Glitnir semur nýjar lánareglur

Friðrik Tryggvason

Bankastjóri Nýja Glitnis segir í bréfi til starfsmanna að bankinn muni grípa til viðeigandi ráðstafana vegna þess að bankaleynd hafi augljóslega verið brotin og vísar þar til greinar Agnesar Bragadóttur í sunnudagsblaði Morgunblaðisins með forsíðufyrirsögninni Lánabók opnuð.

Í bréfinu kemur jafnframt fram að Nýi Glitnir vinni nú að því að endurskoða og bæta enn frekar ýmsa ferla í starfsemi bankans. Nýjar reglur hafi verið lagðar fyrir stjórn bankans. Bréfið er svohljóðandi:

„Kæru samstarfsmenn Nýja Glitnis

Um helgina voru háværar umræður í fjölmiðlum um gamla Glitni og ákveðin lánamál honum tengdum. Ég geri mér fulla grein fyrir hversu illa slík umræða fer í starfsmenn Nýja Glitnis sem stoltir unnu af hollustu fyrir sinn fyrrverandi vinnuveitenda. Ómaklega voru nöfn viðskipta- og lánastjóra dregin fram í blaðagrein sem ekki tengjast umræðunni á neinn hátt.

Bankastarfsemi grundvallast á trausti. Í þeirri umræðu sem farið hefur fram um bankaleynd síðustu daga má ekki gleyma að það er lykilatriði að viðskiptavinir geti treyst bankanum sínum fyrir trúnaðarupplýsingum og að traust ríki á milli starfsmanna bankans hvað þetta varðar. Í umræddu tilviki er augljóst að þagnarskylda var brotin og bankinn mun grípa til viðeigandi aðgerða þar að lútandi.

Nú er í gangi áreiðanleikakönnun á skiptingu gamla og nýja Glitnis. Virt alþjóðlegt endurskoðunarfyrirtæki hefur verið ráðið til að hafa yfirumsjón með þeirri vinnu. Hluti af þessari framkvæmd er rannsókn á starfsemi gömlu bankanna og aðdraganda bankahrunsins. Ég fagna því að slík rannsókn fari fram.

Á þessum tímum er mjög mikilvægt að starfsfólk Nýja Glitnis fái frið til að horfa fram á veginn og leysa úr þeim fjölmörgu úrlausnarefnum sem það stendur frammi fyrir. Það eru stór verkefni framundan við að leysa fjármál viðskiptavina okkar sem vegna þrenginga í efnahagslífinu þurfa úrlausn og stuðning. Þetta er okkar verkefni og því ætlum við að sinna af alúð.

Bestu kveðjur,

Birna„