Brugðist við efnahagsörðugleikum

Viðskiptaráðuneytið og Samkeppniseftirlitið hafa hleypt af stokkunum vinnu við opnun samkeppnismarkaða og eflingu atvinnulífs. Segja stjórnvöld brýnt að ráðast í aðgerðir til þess að opna markaði og viðhalda eða efla samkeppni hér á landi. Með því móti sé greitt fyrir atvinnuskapandi fyrirtækjarekstri.

Viðskiptaráðuneytið segir, að í kjölfar efnahagshruns  hér á landi eigi mörg fyrirtæki í erfiðleikum, atvinnuleysi aukist og heimili glími við skuldir og skertar tekjur. Hætta sé á því að fyrirtækjum fækki á mikilvægum mörkuðum  vegna rekstrarörðugleika. Við þessar aðstæður sé hætta á því að samkeppnishömlur og fákeppni fari vaxandi. 

Samkeppniseftirlitið birtir í dag ítarlega skýrslu um opnun markaða og eflingu atvinnustarfsemi og samkeppni. Í skýrslunni er m.a.þ fjallað um reynslu annarra ríkja af þýðingu samkeppni í efnahagskreppum og hvaða lærdóm megi draga af henni. Þá er bent á leiðir sem opinberir aðilar geta gripið til í því skyni að opna markaði og viðhalda samkeppni. Einnig er fjallað um nýsköpun og frumkvöðla, þar sem dregnar eru á sama hátt fram helstu hindranir og bent á aðgerðir til úrbóta.

Fram kom á blaðamannafundi, þar sem skýrslan var kynnt, að brýnt sé að hefja öfluga uppbyggingu í íslensku atvinnulífi. Reynslan af  efnahagskreppum sýni, að aðgerðir til þess að viðhalda og efla samkeppni stuðla að hraðari endurreisn atvinnulífsins.

Lögð var áhersla á að tryggja verði faglegt og gagnsætt ferli við ákvarðanir bankanna og að þær verði málefnalegar og stuðli eins og mögulegt er að aukinni samkeppni og fjölbreytni í atvinnulífinu.

Samkeppniseftirlitið vinnur nú að skýrslu um eignatengsl í íslensku atvinnulífi, lærdóm sem hægt er að draga af þeim og lausnir til úrbóta.

• 1 blogg um fréttina

Bloggað um fréttina

• Gestur Guðjónsson: Er Samkeppnisstofnun föst með hausinn í eigin koppi?