IMF birtir fjögurra mánaða gamla skýrslu um Ísland

„Ísland er á erfiðum tímamótum. Efnahagslífið er ríkt og sveigjanlegt og langtímahorfur þess eru góðar í ljósi þess að stofnanir eru styrkar og landið ræður yfir gjöfulum náttúruauðlindum. En langvinn heimatilbúin uppsveifla, fjármögnuð af erlendu fé, hefur leitt til mikils ójafnvægis í peningamálum,  skuldsetningar fyrirtækja og þess að landið er háð erlendu fjármagni."

Þannig hefst skýrsla, sem Alþjóðagjaldeyrissjóðurinn birti um Ísland á heimasíðu sinni í gær. Skýrslan er þó ekki ný heldur er um að ræða reglubundna skýrslu um stöðu og horfur í efnahagsmálum og skýrslu, sem fjallar um fjármálastöðugleika en þessar skýrslur voru gerðar eftir heimsókn sérfræðinga sjóðsins hingað til lands dagana 16. júní til 4. júlí. Þær eru dagsettar í ágúst og september, áður en íslenska bankakerfið hrundi.

Stöðunni síðari hluta ágúst er lýst þannig: „Viðskiptahalli hefur farið yfir 15% af vergri landsframleiðslu árlega á undanförnum þremur árum, verðbólga hefur aukist, gengi krónunnar er ofmetið, innlend skuldasöfnun hefur stóraukist og fasteignaverð hefur náð nýjum hæðum. Fjármálakerfið þandist út í um 1000% af vergri landsframleiðslu  og vergar erlendar skuldir námu 550% af landsframleiðslu í lok ársins 2007, aðallega vegna bankakerfisins. Skuldir heimila og fyrirtækja jukust einnig. Uppsveiflan er nú á enda og þessir veikleikar verða enn meiri vegna óvissra ytri aðstæðna."

Þarna virðist fátt ofsagt í ljósi þess sem síðar gerðist.

Skýrslur Alþjóðagjaldeyrissjóðsins

• 1 blogg um fréttina

Bloggað um fréttina

• Dunni: 1000% Þensla og 550% skuldir