Viðskipti | mbl | 15.12.2008 | 11:48

Verðbólgumarkmið mun nást 2010

Verðbólgan er við það að ná hámarki að mati Greiningar Glitnis. Friðrik Tryggvason

Ársverðbólga verður 17,8 prósent, verðbólgumarkmið Seðlabankans munu nást árið 2010, stýrivextir haldast óbreyttir fram í mars á næsta ári og gjaldeyrishöft verða ekki afnumin fyrr en trúverðugleiki krónunar hefur aukist nægjanlega mikið. Þetta kemur fram í nýrri spá frá Greiningu Glitnis.

Í spánni segir að vísitala neysluverðs muni hækka um 1,2 prósent í desember og við það muni ársverðbólgan aukast í 17,8 prósent. Verðbólgan er við það að ná hámarki um þessar mundir og mun hæst fara í um 18 prósent að mati Glitnis á fyrstu mánuðum ársins 2009. Hún fari síðan hríðlækkandi og verði ríflega fjögur prósent í árslok 2009 og verði „í grennd við 2,5 prósenta markmið Seðlabankans árið 2010."

Stýrivextir lækka hratt

Í nýrri spá Greiningu Glitnis um stýrivexti og gengi krónunar segir síðan að stýrivextir Seðlabanka Íslands verði komnir niður í sjö prósent í lok næsta árs og að bankinn muni síðan lækka vexti sína enn meira á árinu 2010. Stýrivextir verði hins vegar óbreyttir, átján prósent, fram í mars á næsta ári.

Styrking krónunar, vaxandi slaki á vinnumarkaði, lækkandi húsnæðis- og hrávöruverð ásamt öðrum erlendum verðbólguþrýstingu mun skapa forsendur fyrir Seðlabankann til að hefja vaxtalækkunarferil.

Dollarinn í 85 krónur

Gangi spá Glitnis eftir mun evran kosta um 120 krónur í lok árs 2009 og dollarinn um 85 krónur. Greining Glitnis reiknar með því að stöðuleiki muni nást á gjaldeyrismarkaði á næstunni og segir að Alþjóðagjaldeyrissjóðurinn haf sagst ekki mæla með því að gjaldeyrishöftin sem eru í gildi á Íslandi verði afnuminn fyrr en sá stöðugleiki næst. Þeim verði aflétt um leið og trúverðugleiki næst á gjaldeyrismarkaði og verða „horfinn að fullu áður en að tveggja ára samstarfsverkefni sjóðsins og íslenskra stjórnvalda á sviði efnahagsmála er á enda."