Grunur um ólögleg verðbréfaviðskipti

Fyrrverandi starfsmaður FL Group og fyrrverandi miðlari hjá Landsbankanum hafa verið kærðir til efnahagsbrotadeildar ríkislögreglustjóra fyrir markaðsmisnotkun samkvæmt heimildum Morgunblaðsins.

Mennirnir tveir eru grunaðir um að hafa gert hærri tilboð í bréf fjögurra norrænna félaga sem FL Group keypti hlut í á árinu 2006 til þess að reyna að þrýsta verði á bréfunum upp.

Athæfi mannanna er talið brjóta gegn lögum um verðbréfaviðskipti og geta þeir átt yfir höfði sér sektargreiðslur eða allt að sex ára fangelsi.

Fjármálaeftirlitið (FME) hefur haft málið til rannsóknar í á annað ár og kæran barst þaðan til efnahagsbrotadeildarinnar.