Segir sveiflur í olíuverði vera vandamál

Gordon Brown, forsætisráðherra Bretlands, sagði á orkumálaráðstefnu orku og olíumálaráðherra 27 helstu olíuframleiðsluríkja og ríkja sem nota mikla olíu, í London í dag, að miklar sveiflur í heimsmarkaðsverði á olíu hefðu slæm áhrif á efnahagslíf heimsins.

Fulltrúar OPEC-samtaka olíuútflutningsríkja sækja einnig ráðstefnuna, en samtökin ákváðu í fyrradag að draga úr olíuframleiðslu um 2,2 milljónir tunna á dag, frá og með næstu áramótum, í þeim tilgangi að freista þess að koma í vef fyrir frekari lækkanir á heimsmarkaðsverði á olíu. Verðið hefur lækkað úr liðlega 140 dollurum á tunnuna í júlímánuði síðastliðnum niður undir 40 dollara, mest vegna minni eftirspurnar í heiminum, sem rakin er til efnahagskreppunnar.

Sagði Brown að vegna mikilla sveiflna á olíuverði sé hætta á því að draga muni verulega úr nýjum fjárfestingum í olíuiðnaði og einnig í mögulegum nýjum orkugjöfum. Það hefði slæm áhrif á efnahagslíf heimsins, þegar til lengdar lætur. Ali Naimi, olíumálaráðherra Sádí Aarabíu tók undir þessi orð Brown.

• Blogga um frétt