Kröfurnar of hátt metnar

Talsmaður hóps fjárfesta sem kallar sig Kröfukaupahópinn, og auglýsti áhuga sinn á að kaupa kröfur á fjögur íslensk félög með miklum afslætti í Morgunblaðinu, segir hópinn þegar hafa fengið nokkur tilboð.

Hann vill ekki koma fram undir nafni en segir í samtali við mbl.is að þeim hafi fljótlega orðið það ljóst að miðað við viðbrögð kröfueigenda hafi þeir metið sumar kröfurnar of hátt. Talsmaðurinn segir Kröfukaupahópinn vera hóp fjárfesta sem vilji nýta sér spennandi fjárfestingatækifæri og því hafi verið ákveðið að fara þessa leið.

Félögin sem eru tilgreind í auglýsingunni, sem birtist á blaðsíðu 41 í Morgunblaðinu í dag, eru Hagar, Bónus, Aðföng og Exista. Hópurinn segir þar að hann sé tilbúin að greiða 47,5 prósent af kröfu sem sé á eindaga innan þriggja mánaða, 35 prósent af kröfu sem sé á eindaga innan hálfs árs og 12,5 prósent fyrir kröfu sem sé á eindaga innan tólf mánaða. Staðgreiðsla sé í boði fyrir þá sem vilji selja þeim kröfur á þessum kjörum. Auk þess séu kröfur á fleiri félög, til dæmis gömlu bankanna, til skoðunnar hjá hópnum.

• 4 blogg um fréttina

Bloggað um fréttina

• Egill Jón Kristjánsson: Líkræningjar.
• Páll Höskuldsson: Kaupendamarkaður
• Hallgrímur Guðmundsson: Ef kröfurnar teljast of hátt metnar
• Guðmundur Pétursson: Spennandi fjárfestingatækifæri eða hrægammar?