Óöruggar veðkröfur íslenskra lánveitenda á Baug Group nema 51 milljarði íslenskra króna, samkvæmt Project Sunrise, sérstakri skýrslu um endurreisn Baugs. Hér er um að ræða lán annarra en föllnu bankanna þriggja.

Stefán H. Hilmarsson, fjármálastjóri Baugs, segir að veðkröfur lánveitenda Baugs á síðari veðréttum séu flokkaðar „óöruggar" í Project Sunrise, þrátt fyrir að tryggingar séu í reynd til staðar, þar sem veðin hafi rýrnað töluvert í verði eftir bankahrunið.

Meðal kröfuhafanna eru þrír sparisjóðir, sem eiga samtals kröfur upp á 12,2 milljarða króna. Ef veðkröfurnar reynast ótryggar yrði þrot Baugs þungt högg fyrir þá sparisjóði sem í hlut eiga.

Meira en þriðjungur hinna óöruggu krafna eru vegna skulda Baugs við tengda aðila eins og Landic Property, Fons og Stoðir. Nema þær samtals 131,4 milljónum punda, eða 19,3 milljörðum króna.

Nánar er fjallað um þetta í Morgunblaðinu á morgun.