Íslenskir neytendur svartsýnir

Væntingar íslenskra neytenda til efnahags- og atvinnuástandsins eru litlar um þessar mundir. Væntingavísitala Gallup mælist nú 24,3 stig samkvæmt könnun sem birt var í morgun. Vísitalan er álíka lág og hún hefur verið síðustu fjóra mánuði eða frá hruni bankanna. Bendir það til þess að neytendur telji að ástandið hafi lítið sem ekkert skánað á þessu tímabili.

Í september mældist vísitalan 76,2 stig og var því talsvert hærri en hún er nú. Hún hafði þó þá lækkað talsvert frá því sem hún náði hæst á góðæristímabilinu en á fyrri helmingi árs 2007 stóð vísitalan að meðaltali í 143,7 stigum, að því er fram kemur í Morgunkorni Íslandsbanka.

93% telja efnahagsástandið slæmt

Ríflega 93% svarenda telja að efnahagsástandið sé slæmt og 72% þeirra telja að atvinnumöguleikar séu litlir. Þá telja 57% þeirra að efnahagsástandið verði verra eftir sex mánuði og 49% þeirra að atvinnumöguleikarnir verði minni eftir þann tíma. Einnig telja 52% þeirra að heildartekjur þeirra muni lækka á næstu sex mánuðum.

Mikill samdráttur í kortaveltu

Svartsýni neytenda endurspeglast vel í neyslu þeirra og fjárfestingum um þessar munir. Mikill samdráttur hefur þannig verið í kortaveltu undanfarið. Tölur um smásöluverslun segja svipaða sögu. Reikna má með að einkaneysla hafi dregist saman um u.þ.b. fimmtung á síðasta fjórðungi nýliðins árs og að samdrátturinn verði jafnvel enn meiri á fyrsta fjórðungi þessa árs. Samdrátturinn í fjárfestingum heimilanna er að líkindum enn meiri.

Það eru ekki einvörðungu íslenskir neytendur sem eru svartsýnir um þessar mundir. Þannig náði bandaríska væntingavísitalan lægsta gildi sínu í 28 ár núna í febrúar. Einnig hafa væntingar neytenda um Evrópu nær alla minnkað umtalsvert undanfarið.

• 2 blogg um fréttina

Bloggað um fréttina

• Einhver Ágúst: Væntingarvístitala?
• Ævar Rafn Kjartansson: Efnahagslíf - hvernig skilja 11 ára gömul börn efnahagslíf.