Áætlun um endurskipulagningu Kaupthing Bank hafnað

Lánardrottnar Kaupthing Bank í Luxembourg höfnuðu í dag í atkvæðagreiðslu áætlun um endurskipulagningu bankans. Frá þessu greina stjórnendur bankans og umsjónarmenn bankans í greiðslustöðvun.

„Atkvæðagreiðslan fór fram í dag, mánudaginn 16. mars 2009, og felldu lánardrottnar bankans samkomulagið.  Annars vegar höfnuðu lánardrottnar sem eiga 53% af útistandandi kröfum samkomulaginu og hins vegar 17 af þeim 25 bönkum um ræðir.  Í báðum tilvikum þurfti samþykki meirihluta til að samkomulagið öðlaðist gildi.

Í framhaldinu munu umsjónarmenn greiðslustöðvunar ásamt yfirvöldum ræða við aðila málsins með það að markmiði að leggja fram nýtt samningstilboð á næstu dögum,“ segir í tilkynningu.

Þann 9. október 2008 var Kaupthing Bank Luxemburg S.A. sett í greiðslustöðvun að ósk bankans skv. dómsúrskurði héraðsdómstóls í Luxembourg.

Í desember s.l. var undirritað samkomulag á milli yfirvalda í Luxembourg og fjárfestingarsjóðs í eigu líbýskra yfirvalda um endurskipulagningu bankans  en þetta samkomulag var háð ýmsum skilyrðum, þar á meðal samþykki lánardrottna bankans.

• 1 blogg um fréttina

Bloggað um fréttina

• Hallgrímur Guðmundsson: Þrátt fyrir þetta áfall þá er Hrói Höttur á Íslandi